«Ўзбекистон почтаси» ОАЖ Жиззах филиалининг «Учтепа» почта алоқа тармоғига қарашли алоқа бўлими бошлиғи моддий манфаат йўлида ўзини тезда «йўқотиб» қўйиб, халқ ишончини суиистеъмол қилди, деб ёзади «Ҳуқуқ» газетаси.
Унинг хизмат вазифасига алоқа бўлимидаги моддий бойликларнинг сақланиши ва бутлиги, тармоқдан келган мадад пулларини хабарчиларга тўлиқ етказиб бериш, хабарчилар ишини назорат қилиш, ҳар беш кунда ва ой якунида тармоққа ҳисоботлар топшириш кирарди.
Нима бўлди-ю, унинг кўзига пулдан бошқаси кўринмай қолди. Моддий манфаатни кўзлаган раҳбар пинҳона равишда фуқароларга бериладиган нафақа пулларини ўзлаштиришга киришди. Мансаб ваколатидан фойдаланиб, бир йил мобайнида нафақа пулларидан бир қисмини ўз эҳтиёжларига ишлатиб юборди. Олинган пулларни эса кейинги берилган маблағ билан ёпиб келаверди. Шунингдек, нафақа пулларини тўлиқ тарқатганлиги тўғрисида сохта ҳисоботлар тузиб, «Учтепа» почта алоқа тармоғига топшириб келди.
Ўтказилган текширишлар натижасида унинг айби билан 51 миллион 58 минг сўмлик камомадга йўл қўйилганлиги аниқланди. Бу пуллар раҳбарнинг эҳтиёжлари йўлида ишлатиб юборилган эди.
Суд ҳукми билан раҳбарга тегишли жазо тайинланди. Шунингдек, у дастлабки тергов давомида аниқланган зарарни қоплаб берди.
Изоҳ (0)