Қозоғистон президенти Нурсултон Назарбоевнинг собиқ куёви Роҳат Алиевнинг Австрия қамоқхонасидаги ўлимида зўравонлик белгилари бўлмаган. Meduza.io’нинг хабар беришича, австриялик ҳамкасблари илтимосига кўра ўрганиш олиб борган швейцариялик судмедекспертлар шундай хулосага келишган.
Санкт-Галлен шаҳрида жойлашган суд медицинаси институти мутахассислари Алиев ўлдирилганини тасдиқловчи бирорта ҳам белгини топа олмаганликларини маълум қилишди.
Аввалроқ, дастлабки текширув ва тергов ҳаракатлари давомида австриялик экспертлар ҳам Роҳат Алиев ўлимига ўз жонига қасд қилиш сабаб бўлгани ҳақидаги хулосага келган эди.
Ўз навбатида, Алиевнинг адвокатлари кимдир қандайдир йўл билан уларнинг собиқ мижозини ўз жонига қасд қилишга мажбур этганини таъкидлашмоқда ва қўшимча экспертизалар ўтказилишини талаб қилишмоқда.
Вена прокуратураси вакилларининг таъкидлашича, Алиев ўлими сабабларини аниқлаш юзасидан тергов ҳаракатлари давом этмоқда.
Қозоғистондаги «Нурбанк» раҳбарларини ўлдириш ва мол-мулкни талон-тарож қилиш иши бўйича Австрия қамоқхонасига жойлаштирилган Роҳат Алиев 2015 йил 24 февралида ўз камерасида осилган ҳолда топилган эди.
Изоҳ (0)