Жанубий Кореянинг «Чосон ильбо» газетаси таъкидлашича, КХДР ҳукумати мамлакатнинг чет элдаги дипломатик ваколатхоналарини мудофаа вазири Хён Ён Чхолнинг қатл этилгани ҳақида хабардор қилган, деб ёзади «РИА Новости». Бундай миш-мишлар халқаро ОАВларда бир ой аввал пайдо бўлган эди.
Нашр манбалари маълумотларига кўра, расмий Пхеньян яқинда мамлакатнинг Хитой ва бошқа давлатлардаги элчихоналари ходимларига Хён Ён Чхол қатли ҳақида хабар берган.
Манба таъкидлашича, мудофаа вазири ҳарбий мажлис чоғида Ким Чен Ин қаршисида мудраб қолгани туфайли ўлдирилгани ҳақидаги гап-сўзлар асослидир.
«Ким Чен Ин фикрича, йиғилишда мудраб қолиш ёки чалғиш унинг қарорига билдирилган эътироздан ҳам ёмонроқдир», — деб ёзади газета манбаларига таяниб.
Эслатиб ўтамиз, Жанубий Корея разведкаси КХДР мудофаа вазири Хён Ён Чхол давлатга хиёнат қилишда айбланиб, қатл этилганини хабар қилган эди.
Разведка маърузасида айтилишича, мудофаа вазири ҳарбий мажлис чоғида Ким Чен Ин қаршисида мудраб қолгани айбловга асос бўлиб хизмат қилган. Натижада вазир зенит тўпи билан отилган.
Қатл 30 апрель атрофида Пхеньяндаги ҳарбий билим юрти ҳудудида амалга ошган.
Кейинроқ КХДР мудофаа вазири Хён Ён Чхолнинг қатл этилиши Пхеньяндаги ғалаёнлар ҳақидаги тасдиқланмаган ахборот билан бир вақтда маълум бўлгани хабар берилди. Ғалаён ҳақидаги ахборот Ким Чен Иннинг кутилмаганда Москвадаги Ғалаба парадига бориш фикридан қайтишига сабаб бўлган бўлиши мумкин.
Изоҳ (0)