Ўзбекистонда қишлоқ туманлари ва шаҳарлар аҳолисини тоза ичимлик суви билан таъминлашни янада яхшилаш, мазкур йўналишдаги лойиҳаларни амалга ошириш учун ҳар йили давлат дастурлари доирасида бюджет маблағлари ҳисобидан қатор лойиҳалар амалга оширилмоқда, деб ёзади ЎзА.
2015—2019 йилларда марказлашган капитал маблағлар ҳисобидан ҳудудларда янги тармоқлар, ичимлик суви иншоотларини қуриш ва реконструкциялаш бўйича 432,8 миллион долларлик лойиҳаларни рўёбга чиқариш кўзда тутилган. Бу 500 мингга яқин аҳоли хонадонида ичимлик суви таъминоти тубдан яхшиланиб, уларнинг турмуш даражаси юксалишига имкон яратади.
Ичимлик суви таъминоти ва канализация тизимларини комплекс ривожлантириш ҳамда модернизация қилишнинг 2015-2019 йилларга мўлжалланган режаси асосида ўттиздан зиёд лойиҳага халқаро молия институтларининг 817,7 миллион доллар маблағи жалб этилиши режалаштирилган. Унга кўра, дастлаб бир нечта вилоятнинг сув иншоотлари, қувурлари ва тармоқлари реконструкция қилинади, янгилари қурилади. Сирдарё вилоятининг бешта туман маркази ва қишлоқ аҳоли пунктларида ичимлик суви таъминотини яхшилаш, Бухоро ва Самарқанд вилоятларида канализация тизимларини реконструкция қилиш борасида Жаҳон банки билан амалга оширилаётган лойиҳалар шулар сирасидандир.
Бундан ташқари, Осиё тараққиёт банки иштирокида «Қўқон ва Андижон шаҳарлари сув таъминоти ва канализацияси тизимлари ҳамда Фарғона, Марғилон ва Риштон шаҳарлари сув таъминоти тизимларини қайта тиклаш» лойиҳаси амалга оширилмоқда. Унга кўра, мазкур шаҳарларда 55 километрлик ичимлик суви тармоқлари реконструкция қилиниб, 68 сув қудуғи ва 4 сув иншооти таъмирланади. Истеъмолчиларга ичимлик суви экологик жиҳатдан тоза ва саломатлик учун зарарсиз ҳолда, полиэтилен қувурлар орқали етказиб берилади.
Изоҳ (0)