«Спорт» телеканали U-20 ЖЧдаги Ўзбекистон ва Австрия ўйинини жонли эфирда намойиш қилишни режалаштирган

11 июнь куни Янги Зеландияда давом этаётган ёшлар ўртасидаги жаҳон чемпионатида Ўзбекистон термаси Австрияга қарши майдонга тушади. «Дарё»нинг Ўзбекистон миллий телерадиокомпаниясидаги манбаси берган хабарга кўра, «Спорт» телеканали ушбу ўйинни жонли эфирда намойиш қилишни режалаштирган.

Телеканалнинг дастурлари рўйхатида нимчорак финалдаги Ўзбекистон U-20 — Австрия U-20 ўртасидаги баҳснинг намойиши кўрсатилмаган. Шундай бўлса ҳам «Спорт» ушбу ўйинни кўрсатиш учун ҳамма нарсани тахт қилиб қўйган.

Техник носозликлар кузатилмаса, ўзбекистонлик футбол мухлислари Австрияга қарши учрашувни Ўзбекистон миллий телерадиокомпаниясининг «Спорт» канали орқали жонли эфирда томоша қилади.

Эслатиб ўтамиз, Ўзбекистон – Австрия беллашуви 11 июнь куни Тошкент вақти билан 09:00 да бошланади.