Польшанинг Вроцлав шаҳрида оғир атлетика бўйича ёшлар ўртасида жаҳон чемпионати баҳслари қизғин давом этмоқда, деб хабар беради Ўзбекистон Миллий олимпия қўмитаси матбуот хизмати.
Дунёнинг 42 давлати вакиллари иштирокида ўтаётган мазкур жаҳон биринчилигида Ўзбекистон шарафини уч нафар спортчи ҳимоя қилмоқда.
Ушбу жаҳон чемпионатида ўзбекистонликлар орасида биринчи бўлиб баҳсларга киришган Адҳамжон Эргашев (-62 кг) даст кўтаришда 124 кг, силтаб кўтаришда 151 кг, икки кураш якунларига кўра 275 кг тошни ўзига бўйсундириб, бир йўла учта кумуш медалга сазовор бўлди.
9 июнь куни вазни 77 килограммгача бўлган спортчилар ўртасида мусобақалар ўтказилиб, унда иштирок этган ўзбекистонлик Файзулла Набиев даст кўтаришда 145 кг, силтаб кўтаришда эса 170 кг натижани қайд этиб, иккикураш якунига кўра 315 кг кўрсаткич билан кучли олтиликдан ўрин эгаллади.
13 июнь куни жаҳон чемпионатида юқори вазнли (+105 кг) полвонлар баҳсларга киришади. Шу куни яна бир ўзбек спортчиси Даврон Кенжаев медаллар учун кураш олиб боради.
Изоҳ (0)