Украина бир қатор ислоҳотларни ўтказиш шарти билан Европа Иттифоқининг 1,8 миллиард евро миқдоридаги ёрдамини қўлга киритиши мумкин бўлади. EuroIntegration.com.ua’нинг хабар беришича, дастлабки, 600 миллион евро миқдоридаги транш қўшимча текширувларсиз тақдим этилади.
Кейинги икки траншни олиш учун эса Украина ҳукумати ислоҳотларни муваффақиятли тарзда ўтказаётганини кўрсатиб бера олиши керак. Хусусан, ҳукумат сентябр ойида 2016 йилги давлат бюджети лойиҳасин Олий Радага тақдим этиши, шундан сўнг уни интернетда эълон қилиши керак.
Бундан ташқари, Украина ҳукумати давлат харидларининг шартлари ва бориши ҳақидаги ахборотларни мунтазам эълон қилиб бориши, шунингдек, электрон савдолар тизимини жорий этиши керак.
Қўшимчасига, Европа Иттифоқи Украина ҳукуматидан давлат хизмати соҳасида ҳам кескин ислоҳотлар ўтказишни талаб қилмоқда. Шу билан бирга, Украина ҳукумати ҳар ой Еврокомиссияга макроиқтисодий вазият, ресурслар ва қарздорлик ҳажми, шунингдек, ислоҳотларнинг бориши ҳақида ахборот бериши керак.
Изоҳ (0)