Рим папаси пиццани соғинаётганини маълум қилди

Рим папаси Франциск 1990 йилдан бери телевизор кўрмаган, дея хабар бермоқда Nur.kz. Понтифик Аргентинанинг La Voz Del Pueblo газетасига маълум қилишича, у телевизор кўришни ўзига эп кўрмайди. Папа шунингдек интернетдан фойдаланмаслигини ҳам тан олди.

Рим папаси аввалги ҳаётидаги нарсалар орасида энг кўп эркинлик ва пиццани соғинишини айтди. «Кўчага чиқсам, кўчалар бўйлаб тинч, хотиржам айлансам, пицерияга кириб, пицца тановул қилсам – мана шуни соғинаман», - деди понтифик.

Бундан ташқари, Францискнинг сўзларига кўра у фақат битта – Италиянинг La Repubblica газетасини ўқийди (эътиборли томони, Ватиканнинг расмий газетаси – L’Osservatore Romano’ни ўқимайди) ва газетани ўқиб чиқиш учун тонгда атиги 10 дақиқа вақт сарфлайди.

Шунингдек, папанинг маълум қилишича, севимли футбол жамоаси – Аргентинанинг «Сан-Лоренцо» жамоаси ўйинлари натижаларидан уни Ватикандаги швейцар гвардияси аъзоларидан бири хабардор қилиб туради.