Air Astana авиакомпанияси ўз ҳамкорлари ва Американинг Ўзбекистондаги савдо палатаси (АЎСП) вакилларини 2015 йил 19 май куни фаолияти бошланганининг 13 йиллигига бағишланган байрам тадбирига таклиф этди, деб хабар қилади авиакомпания.
Тадбир Тошкентдаги Radisson BLU Hotel меҳмонхонасидаги «Яшил боғ» ресторанида нишонланди.
Air Astana’нинг таклифига биноан дипломатлар, чет эл корпорациялари раҳбарлари, журналистлар ва компания ҳамкорларидан иборат 100 дан ортиқ меҳмон маросимга ташриф буюрди.
Байрамнинг энг азиз меҳмонларидан бири – «Ялла» ансамбли раҳбари Фарруҳ Зокиров бўлди. Фарруҳ Зокиров Air Astana’га ажойиб сервис учун миннатдорчилик билдирди ва ўзининг бир нечта машҳур қўшиқларини ижро этди.
Кечада Тошкент — Олма-Ота — Тошкент йўналиши бўйича 2 кишилик бепул чиптага лотерея ўйналди.
Air Astana ўзининг биринчи доимий рейсини 2002 йил 15 майда амалга оширганди. Айни вақтда халқаро ва ички рейсларни амалга оширувчи 60 дан ортиқ йўналиш тармоқларига эга. Авиакомпания Boeing 767-300ER, Boeing 757-200, Airbus А320 ва Embraer Э190 русумли 30 та самолётга эга. Air Astana МДҲ ва Шарқий Европа давлатлари орасида биринчи бўлиб Skytrax халқаро агентлиги томонидан 4 та юлдузга лойиқ топилди. Бундан ташқари, 2013 ва 2014 йилларда тегишлича, Марказий Осиё ва Ҳиндистонда энг яхши авиакомпания номини қўлга киритди. 2015 йил февралида нуфузли AirTransportWorld мукофоти лауреатига айланди.
Изоҳ (0)