Chevrolet компанияси Ford’нинг хот-хетчлари ёки Subaru BRZ билан рақобатлашиши мумкин бўлган компакт спорткар ишлаб чиқмасликка қарор қилди. Бу ҳақда, General Motors’нинг маҳсулотлар бўйича вице-президенти Марк Рейссга асосланиб, Automotive News хабар бермоқда.
GM топ-менежери сўзларига кўра, бундай автомобилларни ишлаб чиқиш учун иқтисодий асос йўқ. Унинг қайд этишича, бу каби машиналар савдоси узоқ вақт фаол давом этмайди. Бундан ташқари, бундай автомобилларнинг нархи ўзидан бир тоифа баланд машиналарникига жуда ҳам яқин.
«Хот-хетч ёки компакт спорткар ишлаб чиқиш биз учун қанчалик муҳим – масала шунда. Ҳозир бизда бу автомобилларга зарурат йўқ. Ҳар доим ҳам шундай бўлиб қоладими? Бундай демаган бўлардим», - деди Рейсс.
Ҳозирги вақтда Chevrolet’нинг моделлар қаторида фақат битта «кучайтирилган» хетчбек – Sonic RS бор. Бу автомобиль 138 от кучига эга 1,4 литр ҳажмдаги турбо двигатель, олти босқичли механик ёки олти диапазонли «автомат» узатмалар қутиси билан таъминланган.
Chevrolet’нинг спорт моделлари қаторида эса уч хил автомобилни кўриш мумкин. Булар – 420 от кучига эга SS седани, 466 от кучига эга V8 двигатель ўрнатилган Corvette суперкари ва янги авлод Camaro купелардир.
Изоҳ (0)