Хитой ва америкалик актёр Жеки Чан 7 май, пайшанба куни Сингапурдаги наркотикларга қарши курашга бағишланган матбуот анжуманида наркотиклар билан боғлик жиноятлар содир қилганлик учун ўлим жазоси белгиланишини қўллаб-қувватлашини маълум қилди. Бу ҳақда «Koрреспондент.net» хабар берди.
«Баъзи масалаларда мен ўлим жазоси тарафдориман. Наркотиклар билан савдо қилувчи ва минглаб болаларнинг ҳаётини бузувчи кишилар жазоланиши керак», — деди актёр.
Эслатиб ўтамиз, Жеки Чаннинг ўғли Жейси Чан 2014 йил сентябрь ойида ўз дўсти − 23 ёшли таниқли тайванлик актёр Ке Чжендун билан биргаликда Пекинда қўлга олинган. Унинг қонида наркотик модда аниқланган, шунингдек Жейсининг уйидан 100 грамм марихуана топилган. У наркотик моддалар истеъмол қилганликда айбланиб, олти ойлик қамоқ жазосига ва 2000 юань (320 доллар) миқдоридага жаримага маҳкум этилган. 13 февраль куни озодликка чиққач, марихуана истеъмол қилгани учун омма олдида узр сўраган эди.
2009 йилда унинг отаси Жеки Чан мамлакатда гиёҳванд моддаларга қарши таълим тарғиботига масъул Хитой наркотикларга қарши кураш миллий қўмитасига раҳбар этиб тайинланган эди. Ўғли ҳибсга олингач, актёр Жейсининг бу қилмиши учун жавобгарликни ўз бўйнига олишини маълум қилган.
Изоҳ (0)