Санжар Шодиев келажакда Муннабой ва Ҳусайн Бойқаро ролларини ижро этмоқчи

Актёр Санжар Шодиев «7х7» газетаси билан суҳбатда келажакда қайси образларни яратмоқчи эканлигини гапириб берди.

«Ўзимни катта-кичик роллар билан авраб юрибман. Аммо асл ниятимни айтсам: мен Муннабой ролини ўйнамоқчиман. Бу ролни шундай маромига етказиб ижро этайки, томошабинлар ‘Ҳақиқий Муннабой Ҳиндистонда эмас, балки ўзимизда’ деб айтишсин. Ҳозирда бор кучимни шунга сафарбар этганман.

Шу билан бирга, феъл-атворимга мутлақо тескари ролни ўйнашни хоҳлайман. Масалан, жиддий, қовоғидан қор ёғадиган одамларни гавдалантириш ниятим бор. Ҳусайн Бойқаро ролини ўйнаш эса энг катта орзуим».

Санжар Шодиев ҳозирги кунда нималар билан банд эканлигини ҳам айтиб ўтди.

«Айни пайтда иккита фильм сценарийси устида иш олиб боряпман. ‘Ўзингдан қўймасин, халқим’ деб номланган биринчи фильмни нафақат юртимизда, балки АҚШда ҳам тасвирга олиш режада бор. Иккинчи картина эса асосан аёлларимиз ҳаётига бағишланади».