Вафот этгани тахмин қилинган «Шум бола»даги Омон ролини ўйнаган актёр тирик эканлиги маълум бўлди

«Даракчи» газетасида чоп этилган мақолада «Шум бола» фильми ижодкорлари орасида вафот этган актёрлар ёдга олинганди. Улар қаторига Омон ролини ижро этган Саидкарим Саидорипов ҳам киритилганди.

Юқоридаги маълумот фильм режиссёри Дамир Салимовнинг тасдиғига кўра берилган.

Мақола чоп қилинганидан сўнг, Саидкарим Саидориповнинг ўзи газета таҳририятига қўнғироқ қилиб, «Мен ‘Шум бола’даги Омонман. Тирикман!» деганида, таҳририят аъзолари ҳам бу гапдан шошиб қолган. Дамир Салимовга қўнғироқ қилинганда, у ҳам ҳайратини яшира олмаган:

«Ие! Ростанми? Яхшиямки, фильм ҳақида мақола чоп этибсизлар, шу баҳонада эски қадрдонимиз, актёримиз ҳаётлиги ҳақидаги хушхабарни эшитдик! Бундан жуда хурсандман. Анча илгари унинг вафот этгани тўғрисида эшитгандим. Умри узоқ бўларкан. ‘Шум болаъдан бошқа фильмларда рол ижро этмаган бўлса-да, Саидкарим ижросидаги бу рол томошабинларимиз қалбидан ўчмас жой олган. Омон бўлсин».