Филиппинлик боксчи Мэнни Пакьяо америкалик боксчи Флойд Мейвезер билан жанг олдидан жароҳатини яширгани учун 4 йилгача қамоқ жазосига ҳукм қилиниши мумкин, деб хабар беради «Sportbox.ru».
Пакьяо жангдан 3–4 ҳафта олдин елкасини шикастлаб олган. Шу ҳафта охирида у операция қилинади. Операция туфайли филиппинлик боксчи ярим йил давомида машғулот ўтказа олмайди. Жангдан олдин иккала боксчи ҳам сўровнома тўлдирганди ва жароҳат бор-йўқлиги ҳақидаги бандга Пакьяо салбий жавоб берганди.
Жанг бўлиб ўтган Невада қонунларига кўра, атайлаб ёлғон кўрсатма берган шахс жазога тортилади. Бу турдаги жиноят содир этганлар 1 йилдан 4 йилгача қамоқ жазосига ҳукм қилиниши ва 5 минг доллар жарима тўлаши кўзда тутилган.
Эслатиб ўтамиз, ҳакамлар овозига кўра, Мейвезер Пакьяо устидан ғалаба қозонганди.
Изоҳ (0)