Ўзбекистон Ахборот технологиялари ва коммуникацияларини ривожлантириш вазирлигида 5 май куни Korean Air авиакомпанияси президенти Чи Чанг Хун билан учрашув бўлиб ўтди. Бу ҳақда UzDaily хабар бермоқда.
Учрашувда Ўзбекистон ва Жанубий Корея ўртасида ўзаро ҳамкорлик, хусусан ахборот-коммуникация технологиялари йўналишида кадрлар тайёрлаш юзасидан икки томонлама алоқалар муҳокама қилинди.
Жумладан, томонлар 2014 йилда Ўзбекистон Президентининг ташаббуси ва Жанубий Корея ҳукуматининг қўллаб-қувватлаши, ҳукуматларнинг саъй-ҳаракатлари натижасида қисқа муддат ичида қуриб, фаолияти ташкил қилинган, Тошкент шаҳридаги нуфузли Инха университетини эътироф этишди.
Шу билан бирга, хорижда ташкил этилган Жанубий Кореянинг илк ҳамкорликдаги олий таълим муассасаси эканини инобатга олиб, Тошкент шаҳридаги Инха университетининг истиқболдаги фаолиятини замонавий талаблар асосида янада такомиллаштириш муҳимлиги қайд этилди.
Томонлар университетни қўллаб-қувватлаш, хусусан таълим маскани ҳудудидаги қурилиш ишларини давом эттириш, замонавий технологиялар билан таъминлаш, Жанубий Корея ва бошқа мамлакатлардан малакали педагогларини жалб қилиш юзасидан келишиб олдилар.
Маълумот учун, Жанубий Кореянинг йирик ва нуфузли Korean Air авиакомпанияси Инха университети муассиси ҳисобланган Hanjin Group компаниялари гуруҳи таркибига киради.
Изоҳ (0)