Афғонистон президентининг Марказий Осиё бўйича махсус вакили Шокир Каргар бошчилигидаги Афғонистон делегацияси ўтган ҳафта ташриф билан Ўзбекистонда бўлди. Review.uz’нинг хабар беришича, Каргар Ўзбекистон иқтисодиёт вазири Галина Саидова билан иккитомонлама битим имзолаган.
Ўзбекистон ва Афғонистон ҳукуматлари энергетика, транспорт, савдо ва транзит соҳаларидаги ҳамкорликни янада мустаҳкамлашга доир битим имзолаган. Ҳужжат икки мамлакат авиакомпаниялари Тошкент ва Кобул ўртасида бевосита авиақатновларни йўлга қўйиши ҳақида ҳукуматлараро ахборот тайёрланишини кўзда тутади.
Афғонистон Ташқи ишлар вазирлиги матбуот котиби Шокиб Мустагнийнинг маълум қилишича, битимнинг имзоланиши икки мамлакат ўртасидаги савдо ва транзитнинг ривожига халал бераётган тўсиқларни бартараф этади. Хусусан, Ўзбекистон темирйўл инфразутилмасини қуриш бўйича лойиҳаларни амалга оширишда Афғонистонга ёрдам беради.
Битимларга кўра, Ўзбекистон томони «Ҳайратон – Ҳирот» темирйўлини қуриш ҳамда Мозори-Шариф ва Ҳирот шаҳарларини боғловчи ҳалқа йўлини қуриш учун геология-разведка ишларини олиб бориш ишларида ҳам Афғонистонга кўмак беради.
Бундан ташқари, Афғонистон пойтахтида ҳам, Ўзбекистон пойтахтида ҳам икки мамлакатнинг биргаликдаги саноат ярмаркалари ташкил этилади.
Изоҳ (0)