АҚШ давлат департаменти Россия президенти Владимир Путиннинг АҚШ махсус хизматлари Шимолий Кавказдаги жангарилар билан алоқада бўлгани ҳақидаги баёнотига изоҳ бера олмади. Бу ҳақда Financial Times хабар бермоқда.
Путиннинг баёноти 26 апрель, якшанба «Россия 1» телеканали орқали намойиш этилган «Президент» фильмида келтириб ўтилганди. Путиннинг сўзларига кўра, Шимолий Кавказдаги жангарилар билан АҚШнинг Озарбайжондаги махсус хизмат вакиллари алоқага чиқишган, ҳатто, Россияга хавф туғдирган Шимолий Кавказдаги жангариларга АҚШ томони транспорт воситалари билан ҳам ёрдам берган.
«Мен бу ҳақда АҚШнинг ўша вақтдаги президентига айтганимда, у бунга қарши албатта чора кўрилишини билдиргандек бўлганди. Орадан ўн кун ўтиб эса қўл остимдагилар, Федерал хавфсизлик хизмати раҳбарлари, АҚШдаги ҳамкасбларидан хат олишди. Унда шундай дейилганди: «Биз Россиядаги мухолифат кучларини ҳар доим қўллаб-қувватлаб келганмиз. Бунга ҳаққимиз бор деб ҳисоблаймиз ва бундан кейин ҳам уларни қўллаб-қувватлашда давом этамиз», – деди Путин.
Путиннинг қайд этишича, геосиёсий вазифаларни ҳал қилиш мақсадида террорчиларни қўллаб-қувватлаш номақбул ҳаракатдир. «Лаҳзалик сиёсий ёки геосиёсий вазифани ҳал қилиш керак бўлса ҳам, ҳеч қайси ҳолатда, ҳеч қачон ва ҳеч ерда террорчилардан фойдаланишга ҳатто уриниб ҳам кўрмаслик керак, чунки уларни бир жойда қувватласанг, эртага улар бошқа жойда бош кўтариб, кеча ўзларини қўллаб-қувватлаган кучларга қарата албатта зарба беришади», - деди Путин.
Изоҳ (0)