Покистоннинг шимоли-ғарбидаги кучли ёмғир оқибатида юзага келган сув тошқинлари сабабли 37 киши ҳалок бўлди, 200 дан ортиқ одам турли тан жароҳатлари олди. Бу ҳақда маҳаллий ҳукуматга таяниб, Reuters агентлиги хабар қилмоқда.
Кучли бўрон дарахтларни ва симёғочларни ағдариб, уйларни бузиб юборди. Вилоят ахборот вазири Хайбер-Пахтунхва Муштак Ғанининг сўзларига кўра, барча касалхоналарда фавқулодда вазият жорий қилинган.
Жаланинг кечаси билан ёғишини инобатга олган ҳолда штат пойтахти ҳисобланмиш Пешовар шаҳри аэропортида барча рейслар қолдирилган.
Ёмғир инфратузилмага ҳам жиддий зарар етказган. Табиий офат рўй берган ҳудудга қидирув-қутқарув ишларини олиб бориш учун ҳарбийлар жўнатилган.
2014 йилнинг август ойи охири ва сентябрь ойининг бошида бир неча сув тошқинлари натижасида Покистоннинг шимоли-ғарбий вилоятларида 300 га яқин киши ҳалок бўлганди. 2010 йилдаги тошқин оқибатида эса 1800 киши ҳаётдан кўз юмган ва 10 миллиондан ортиқ покистонлик бошпанасиз қолганди.