AQSH davlat departamenti Rossiya prezidenti Vladimir Putinning AQSH maxsus xizmatlari Shimoliy Kavkazdagi jangarilar bilan aloqada bo‘lgani haqidagi bayonotiga izoh bera olmadi. Bu haqda Financial Times xabar bermoqda.
Putinning bayonoti 26 aprel, yakshanba “Rossiya 1” telekanali orqali namoyish etilgan “Prezident” filmida keltirib o‘tilgandi. Putinning so‘zlariga ko‘ra, Shimoliy Kavkazdagi jangarilar bilan AQSHning Ozarbayjondagi maxsus xizmat vakillari aloqaga chiqishgan, hatto, Rossiyaga xavf tug‘dirgan Shimoliy Kavkazdagi jangarilarga AQSH tomoni transport vositalari bilan ham yordam bergan.
“Men bu haqda AQSHning o‘sha vaqtdagi prezidentiga aytganimda, u bunga qarshi albatta chora ko‘rilishini bildirgandek bo‘lgandi. Oradan o‘n kun o‘tib esa qo‘l ostimdagilar, Federal xavfsizlik xizmati rahbarlari, AQSHdagi hamkasblaridan xat olishdi. Unda shunday deyilgandi: “Biz Rossiyadagi muxolifat kuchlarini har doim qo‘llab-quvvatlab kelganmiz. Bunga haqqimiz bor deb hisoblaymiz va bundan keyin ham ularni qo‘llab-quvvatlashda davom etamiz”, – dedi Putin.
Putinning qayd etishicha, geosiyosiy vazifalarni hal qilish maqsadida terrorchilarni qo‘llab-quvvatlash nomaqbul harakatdir. “Lahzalik siyosiy yoki geosiyosiy vazifani hal qilish kerak bo‘lsa ham, hech qaysi holatda, hech qachon va hech yerda terrorchilardan foydalanishga hatto urinib ham ko‘rmaslik kerak, chunki ularni bir joyda quvvatlasang, ertaga ular boshqa joyda bosh ko‘tarib, kecha o‘zlarini qo‘llab-quvvatlagan kuchlarga qarata albatta zarba berishadi”, - dedi Putin.
Izoh (0)