Ҳиндистоннинг Биҳар штатига ёпирилган бўрон натижасида 55 киши ҳалок бўлди, 80 дан ортиқ одам тан жароҳати олди. Бу ҳақда NDTV телеканали хабар бермоқда.
Табиий офатдан Биҳарнинг умумий ҳисобда 12та тумани зарар кўрган. Амалдорларнинг фикрича, Ҳиндистон табиатини олдиндан билиб бўлмаслик ва бўроннинг яқинлашиб келаётганини олдиндан кўра билмаган синоптиклар фожеанинг асосий сабабчиларидир. Штат бош вазири Нитиш Кумарнинг маълум қилишича, Ҳиндистон бош вазири Нарендра Моди штатга барча зарурий ёрдамни кўрсатишга ваъда берган.
Коммунал хизматлар ҳозирги вақтда табиий офатдан зарар кўрган туманлар билан транспорт алоқасини ўрнатишяпти, электр таъминотини қайта тиклашяпти ва телефон лииняларини тўғрилашяпти. Биҳар штати ҳукумати ҳалок бўлганларнинг оила аъзоларига 400 минг рупий (6,3 минг доллар) миқдорида компенсация пули берилишини маълум қилган. Бундан ташқари, бошпанасидан маҳрум бўлганлар қўшимча равишда 25 килограмм ғалла, кийим-кечак сотиб олиш учун 1,8 минг (тахминан 30 доллар), идиш-товоқ сотиб олиш учун 2 минг рупий (тахминан 31 доллар) ва яна шунча нақд пул олишади.
Аграр соҳага ихтисослашган Биҳар штати Ҳиндистон шарқида жойлашган бўлиб, иқтисодиётининг жуда суст ўсаётгани билан ажралиб туради. Ялпи ҳудудий маҳсулотининг ҳажми бўйича Биҳар Ҳиндистон штатлари орасида энг охирги, айни вақтда, аҳоли сони бўйича учинчи ва зичлиги бўйича биринчи ўринда туради.
Изоҳ (0)