Ўзбекистондаги 5 та ва Тожикистондаги 8 та партиядан фарқли ўлароқ, Қирғизистонда 199 та партия рўйхатга олинган. Бу ҳақда Қирғизистон адлия вазири ўринбосари Бишкекда бўлиб ўтган давра суҳбатида айтиб ўтди, деб ёзади «Knews.kg».
Унинг сўзларига кўра, Адлия вазирлиги органларида сиёсий партияни рўйхатдан ўтказиш учун камида 10 кишидан имзо йиғиш керак.
«Қирғизистонда айни пайтда 199 та сиёсий партия рўйхатдан ўтган. Таққослаш учун, Россияда партияни камида 500 киши туза олади, шу сабабли у ерда 77 та партия мавжуд. Беларусда партия камида минг киши иштирокида ташкил қилинади, у ерда 15 та партия рўйхатдан ўтган. Тожикистонда 8 та партия бор. Ўзбекистонда партия тузиш учун камида 2 минг кишининг имзоси талаб этилади ва у ерда рўйхатдан ўтган партиялар сони 5 та», — деди адлия вазири ўринбосари.
Кутуева янги қонун лойиҳаси сиёсий партияларни рўйхатга олишга алоқадор қонунга ўзгартириш киритишни кўзда тутишини айтди. Партияни рўйхатга киритиш учун талаб этиладиган шахслар сонини 10 дан 120 нафаргача ошириш таклиф қилинмоқда.
Изоҳ (0)