Саудия Арабистони ва унинг коалиция бўйича иттифоқдошлари 21 апрель, сешанба куни «Жасорат бўрони» операцияси якунланганини эълон қилган бўлса-да, Яман бўйлаб тўрт марта зарба берди, деб ёзади ТАСС.
Al Mayadeen телеканали хабарига кўра, рейдлар Саудия қироллиги билан чегарадош бўлган Саада провинциясига амалга оширилган. Манбахдаги тоғли қишлоқлар, Хамдандаги ҳарбий лагерь ва бошқалар ўққа тутилган.
Аввалроқ «Ансар Аллоҳ» шиалар ҳаракати вакили Муҳаммад ал Кейраий «араб коалицияси»нинг Ямандаги ҳарбий операцияни тўхтатиш тўғрисидаги кутилмаган қарорини «бошланган тажовузнинг барбод бўлиши» деб баҳолаган эди.
Эслатиб ўтамиз, Саудия Арабистони раҳбарлигидаги коалиция қўмондонлиги вакили Аҳмад ал Асирий Ар-Риёддаги матбуот анжуманида коалициянинг «Жасорат бўрони» ҳарбий операцияси Яман президенти Абду Раббо Мансур Ҳодий илтимоси билан якунланини эълон қилган эди. Унинг айтишича, операция тўхтатилганига қарамай, коалиция хусийларнинг олға силжишига қаршилик қилишда давом этади.
Изоҳ (0)