«Ўзавтосаноат» акциядорлик компанияси Ford автомобилларини Россияда ишлаб чиқариш, Россия бозорида ушбу русумдаги автомобилларни импорт қилиш ва унинг барча маҳсулотларини сотиш билан шуғулланувчи Ford Sollers компанияси билан ҳамкорликни йўлга қўйишни режалаштирмоқда. Бу ҳақда Uzbekistan Today хабар бермоқда.
«Ўзавтосаноат» вакиллари яқинда Москвада бўлиб ўтган XVIII Россия автомобилсозлик форумида ишлаб чиқарувчи ва биринчи даражадаги етказиб берувчи автомобилсозлик компанияларнинг харидлар бўйича директорлари билан музокаралар ўтказишди.
Хусусан, ўзбекистонлик мутахассислари PSMA Rus компаниясининг лойиҳавий харидлар бўйича раҳбари ҳамда ривожланиш ва етказиб берувчилар сифати бўйича менежери Александр Смолянкин, шунингдек, Ford Sollers компаниясининг харидлар бўйича вице-президенти ўринбосари Николай Ходосевич билан юзма-юз музокаралар олиб боришди.
PSMA Rus автозаводи Калугадаги «Росва» технопарки ҳудудида жойлашган бўлиб, у ерда 2010 йилдан бери PSM Peugeot Citroen Mitsubishi концерни моделлари йиғилади.
Суҳбат давомида «Ўзавтосаноат» вакиллари Ўзбекистон автомобилсозлик компаниялари имкониятлари ҳақида ахборот беришди. Учрашув якунлари бўйича PSMA Rus ва Ford Sollers компаниялари билан икки томонлама ҳамкорлик имкониятларини кўриб чиқиш ҳақида келишувга эришилди.
Изоҳ (0)