Daewoo Gentra Россияда 500 000 рублгача бўлган автомобиллар рейтингида биринчи ўринни эгаллади

«Mail.ru»нинг автомобиллар бўлими Россияда 500 минг рублгача бўлган машиналар рейтингини тузди. Ушбу бешликда биринчи ўринни Daewoo Gentra эгаллади.

Daewoo Gentra’нинг нархи 419 минг рубль (тахминан 7340 доллар)дан бошланиши, оптимал комплектация эса 499 минг рубль (8740 доллар)га тушиши қайд этилди.

«Daewoo Gentra фақат седан кузовида ҳажми 1,5 литрга тенг бензинли тўрт цилиндрли ягона двигателли ҳолатда таклиф этилади. Ушбу мотор Тошкентдаги GM Powertrain Uzbekistan корхонасида ишлаб чиқилади ва аввал Chevrolet Lacetti’га қўйилган агрегатлардан хусусиятларига кўра бироз фарқланади», — деб ёзади нашр.

Шунингдек базавий Gentra’ни харид қилиш тавсия этилмаган. «У ‘бўш’ ва ‘хавфли’», — дея қайд этилади хабарда ҳамда унда хавфсизлик ёстиқлари йўқлиги таъкидланади. Антиблокировка тизими, иккита хавфсизлик ёстиғи, кондиционер, электр пакет, креслоларни иситиш тизими ва бошқа зарур нарсаларга эга Optimum Plus комплектацияси тавсия этилган.

Рейтингнинг кейинги поғоналарини Renault Logan (425 минг рубль — 7520 доллардан бошланади, оптимал комплектацияси 507 500 рубль — 8980 доллар), Lada Kalina Cross (471 минг рубль — 8330 доллардан бошланади), Datsun on-DO (376 минг рубль — 6650 доллардан бошланади, оптимал комплектацияси 447 минг рубль — 7900 доллар), Lada Granta лифтбеки (348 800 рубль — 6170 доллардан бошланади, оптимал комплектацияси 401 600 рубль — 7100 доллар) эгаллади.