Чехия президенти маъмуриятининг ташқи сиёсат департаменти директори Гинек Кмоничекнинг маълум қилишича, Чехия президенти Милош Земан АҚШнинг Прагадаги элчиси Эндрю Шапирони фақат бир шарт билан – АҚШ президенти Барак Обама Чехиянинг Вашингтондаги элчиси Петр Гандалович билан учрашсагина қабул қилади. Бу ҳақда iDNES хабар бермоқда.
Кмоничекнинг сўзларига кўра, ҳозирги вақтда Чехия президентининг АҚШ элчиси билан учрашиши учун ҳеч бир сабаб йўқ.
«Чехия президенти уни расман қабул қилиши учун элчи Шапиро Прагадаги бошқа ҳар қандай элчи каби ҳақиқатан ҳам катта ва муҳим сабаб топиши керак», - деди Кмоничек.
Айни вақтда, департмент бошлиғининг қайд этишича, агар «Обама эртага Гандаловични қабул қилганида эди», Земан ҳам Шапиро билан учрашган бўларди.
Бундан аввал Чехия президенти Милош Земан, унинг 9 май куни Москвада бўладиган Ғалаба куни тантаналарига бориши юзасидан АҚШ элчиси Эндрю Шапиро омма олдида билдирган танқидий фикрларга тоқат қилиб бўлмаслигини айтиб ўтганди.
«Энди Шапиро учун Прага Гради (Чехия президенти қароргоҳи) эшиклари ёпилди», - деганди Чехия президенти.
Изоҳ (0)