Канада илк марта Сурия ҳудуди бўйлаб авиаҳужум уюштирди

Канада қуролли кучлари биринчи марта Сурия ҳудуди бўйлаб авиаҳужум уюштирди, дея хабар бермоқда «РБК» Канада мудофаа вазирлигига таяниб.

Март ойида Канада ҳукумати ИШИД билан кураш бўйича ҳарбий миссияни кенгайтириш ҳақида қарор қабул қилган эди.

«Кенгайтирилган мандат доирасидаги биринчи авиазарба ҳукуматимизнинг Канадага қарши терроризм таҳдиди билан курашда, шунингдек халқаро хавфсизлик ва барқарорликни мустаҳкамлашда кучли қатъиятга эга эканлигини кўрсатди», — деди Канада мудофаа вазири Жейсон Кенни.

Ракка шаҳри яқинида уюштирилган авиаҳужумда Канаданинг иккита CF-18 қирувчи-бомбардимончи самолёти коалициянинг ўнта самолёти ҳамроҳлигида қатнашди.