Google компанияси Twitter’ни сотиб олмоқчи эканлиги миш-мишлар ортидан, Нью-Йорк фонд биржаси (NYSE)да Twitter’нинг бир дона акцияси баҳоси 7 апрель куни 5 фоизга – 53,28 долларгача қимматлашди. Бу ҳақда Reuters хабар бермоқда.
Шундай қилиб, The Telegraph газетасининг қайд этишича, микроблоглар сервисининг капитализацияси дарҳол 1,5 миллиардга қимматлаб, 34 миллиард доллардан ошиб кетган. Twitter акциялари баҳоси бирдан ўсиб, 8 апрель куни барқарор ҳолатга келган – шу куни NYSE’да Twitter’нинг бир акцияси 52,97 долларга баҳоланаётган эди.
Briefing.com таҳлил компанияси маълумотларига кўра, Twitter ўзини сотиш ҳақида тушган бирданига икки таклифдан қутулиш мақсадида Goldman Sachs компаниясини ёллаган. Салоҳиятли харидорлар орасида Google ҳам бўлган. Twitter’нинг ўзи эса бу ҳақдаги миш-мишларга изоҳ бермаяпти.
The Guardian газетасининг тахминича, Google ихтиёрида 60 миллиард доллардан ортиқ нақд пул бўлган ҳозирги вақтда Twitter микроблоглар сервисини сотиб олиш учун 50 миллиард доллардан воз кечолган бўларди.
Google Twitter’ни сотиб олиши мумкинлиги ҳақидаги миш-мишлар кўпдан бери бор. Хусусан, шундай хабарлар 2015 йилнинг январида ҳам тарқалган, натижада Twitter’нинг акциялари баҳоси 3,3 фоизга қимматлашган эди. 2011 йил февралида эса Google, Facebook ва бошқа бир неча компаниялар Twitter’ни 10 миллиард доллар эвазига «ютиб юбориш» юзасидан музокаралар ўтказаётгани ҳақида хабарлар берилган эди.
Бундан ташқари, Twitter асосчиларидан Эван Уильямс ва Биз Стоун Google билан савдо қилиш тажрибасига эга – 2003 йили улар ўзларининг Blogger блог-платформасини Google’га сотишган. Савдо қиймати ошкор қилинмаган.
Ҳозирги вақтда Twitter’нинг бир ойда 288 миллион фаол фойдаланувчиси бор. Бир кунда микроблоглар сервисида 500 миллион хабар (твит) ёзилади. Компаниянинг йиллик пул айланмаси 1 миллиард долларга баҳоланмоқда.
Изоҳ (0)