Skype’нинг ишонувчан фойдаланувчиларидан алдов йўли билан пул оладиган товламачилар тармоғи Россия ва МДҲда ўндан ортиқ офис ва бир неча юзлаб аккаунтларга эга. Бу ҳақда ташкилотнинг аноним аъзоси Россиядаги «Хабрахабр» ҳамжамияти фойдаланувчисига маълум қилди, дея хабар бермоқда TJournal.
Фирибгарлар тармоғининг аноним ходими сўзларига кўра, улар ишлайдиган ташкилотнинг ўзида Россияда еттита, МДҲ мамлакатларида эса яна тўртта офис бор. Иш смена бўйича олиб борилади, унинг жамоаси етти кишидан иборат, катта эҳтимол билан, иккинчи сменада ҳам шунча киши ишлайди.
Лойиҳа иштирокчиларининг ўзи бузилган Skype аккаунтлари ва пул ўтказилиши сўраладиган электрон хамёнларнинг рақамлари қаердан олинишини билишмайди. Асосан Qiwi хамёнларидан фойдаланилади, чунки «Яндекс.Денги»нинг хамёнларини «персоналлаштириш бироз қимматроқ».
Ташкилот ходимлари маълум бир малакага эга бўлишлари лозим: фирибгарнинг сўзларига кўра, ходимлар психология бўйича камида иккита китоб ўқиб чиққанидан сўнг ишга қабул қилинади. Ҳуқуқбузарлар баъзан чатда аввалги сўзлашув матнидан фойдаланишга ҳаракат қилишади, бироқ, бир вақтнинг ўзида учтадан 20 нафаргача одам билан мулоқот олиб борилгани сабаб, ҳар доим ҳам бундан самарали фойдаланиб бўлмайди.
Нишон сифатида одатда контактлар рўйхатидан пул тўлаш қобилияти бор кишилар танлаб олинади: фойдаланувчининг ёши қанча катта бўлса, шунча яхши. Агар профилда унинг ёши кўрсатилмаган бўлса, унинг ники (тахаллуси) ёки фамилия ва исмларини тўлиқ киритгани унинг «жиддийлиги»ни кўрсатиб бериши мумкин.
Ҳар бир ходим бир ойда режа бўйича камида 100 минг рубль «ишлаши» керак, шундан 40 фоизини ўзига маош сифатида олади. Агар «унумли ишласа», қўлга киритилган сумманинг 50 фоизи ходимга берилади, бироқ бериладиган пул ҳеч қачон 200 минг рублдан ошмайди; аноним ходим бунинг сабабини маълум қилмаган.
Аноним ходимнинг маълум қилишича, бир «қурбон»дан кўпи билан 14 минг рубль олиш мумкин. Бу нарса оммабоп электрон пул ўтказиш тизимларида ўтказиладиган пул миқдори 15 минг рубль қилиб чеклангани билан боғлиқ бўлиши мумкин. Агар 11 офиснинг ҳар бирида 14 нафардан ходим ишлаши инобатга олинса, бундай компаниянинг йиллик пул айланмаси 180 миллион рублга тенг эканини тахмин қилиш мумкин.
Ходимларнинг хавфсизлигини таъминлаш мақсадида VPN-боғланиш билан созланган алоҳида серверлардан фойдаланилади, бироқ ходимларнинг ўзини ҳам туҳмат қилиш билан қўрқитишади.
«Ўйлашимча, улар кўраётган хавфсизлик чоралари етарли. Ҳар қандай ҳолатда ҳам, биз босим остидамиз. Агар ишламасанг – сенга қарши нимадир топишади. Ёки нимадир қилишади… Ҳозир бу ҳақида гапиришни хоҳламайман», - деди фирибгарлик гуруҳининг аноним аъзоси.
Аноним фирибгарнинг сўзларига кўра, у бу ишни эълон орқали топган, бироқ бу эълонда нима деб ёзилганини маълум қилишни хоҳламаган.
17 март куни россиялик блогер ва тадбиркор Сергей Доля Acronis компанияси PR-директори Екатерина Турцеванинг Skype аккаунти бузилгани ҳақида хабар берганди: жиноятчилар унинг дўстидан «Яндекс.Кошелёк»га 15 минг рублдан пул ўтказишни сўрашган. Skype ушбу ҳолат юзасидан изоҳ беришдан бош тортган.
Изоҳ (0)