Сингапур ҳукумати биринчи бош вазир Ли Куан Юнинг аҳволи оғирлигини маълум қилди

Сингапурнинг биринчи бош вазири Ли Куан Ю оғир аҳволда ётибди, дея хабар бермоқда Reuters мамлакат вазирлар маҳкамаси баёнотига таяниб.

91 ёшли Ли Куан Ю Сингапур касалхонасининг интенсив даволаш бўлимида ётибди. 19 март, пайшанба куни шифохонага юзлаб кишилар, жумладан ўнлаб журналистлар ташриф буюрди.

Эслатиб ўтамиз, Ли Куан Ю февраль бошида пневмониянинг оғир шакли билан касалхонага ётқизилган эди.

«Жаноб Ли Куан Юнинг аҳволи инфекция туфайли ёмонлашди. У антибиотиклар билан даволанмоқда. Шифокорлар унинг аҳволини диққат билан кузатмоқда», — дейилади Сингапурнинг ҳозирги бош вазири Ли Сянлун (Куан Юнинг ўғли) баёнотида.

Ли Куан Ю  — таниқли сингапурлик сиёсатчи 1959 йилда Сингапур мустақилликка эришгач, унинг тарихидаги илк бош вазирга айланган ва 31 йил давомида ўз лавозимини эгаллаб келган.