«Пахтакор» клуби Осиё Чемпионлар лигаси гуруҳ босқичи доирасида сафарда «Ал Шабоб»га қарши учрашувда майдонга тушди ва дуранг ўйнади, деб хабар бермоқда «Uff.uz».
Аввалига биринчи бўлимда «шерлар»нинг иши у қадар юришмади. Боз устига гол ҳам ўтказиб юборилди. Ҳимоянинг хатоси эвазига «Ал Шабоб» ҳисобни очишга муваффақ бўлди.
Ушбу голдан сўнг ҳам Самвел Бабаян шогирдларининг ўзига келиши қийин бўлди. Танаффусга қадар ўйиннинг боришида ўзгариш бўлмади. Фақат иккинчи бўлимда «Пахтакор» футболчилари ташаббусни ўз томонига оғдира олдилар.
Самвел Бабаян иккинчи бўлим бошидаёқ майдон марказида ўзгариш қилишга қарор қилди. Асосий эътиборни ҳимояга қаратган Акбар Исматуллаев ўрнига ҳужумкор ярим ҳимоячи Жалолиддин Машарипов майдонга туширилди. Айнан мана шу захира алмаштириши ўйиннинг боришини ўзгартириб юборди. 71-дақиқада Жалолиддин Машарипов тўпни жарима майдончаси томон ошириб берди. Игорь Сергеевнинг биринчи зарбаси қовушмаган эди, аммо дарвоза тўсинига тегиб қайтган тўпга унинг ўзи биринчи бўлиб етиб келди ва ҳужумчи иккинчи имкониятда адашмади.
Орадан ҳеч қанча вақт ўтмай «Пахтакор» иккинчи голини киритди. Бу голда ҳам асосий ишни Игорь Сергеев бажарди, дейиш мумкин. Сергеев рақиб жарима майдончаси ичида тўпни ўзига ўнглаб олаётганда рақиб ҳимоячилари унга нисбатан қўполлик қилдилар. Ҳакам иккиланмай пенальти белгилади. Ўн бир метрлик белгидан зарба беришда Кахи Махарадзе адашмади ва «Пахтакор» ҳисобда олдинга чиқиб олди.
Бироқ бу гол «Пахтакор»га ғалаба келтириш учун камлик қилди. Ўйин якунланишига бир неча дақиқа қолганида ҳимоя хатога йўл қўйилди ва «Ал Шабоб» ҳисобни тенглаштирди.
ОЧЛ-2015, “B” гуруҳи, 2-тур.
«Ал Шабоб» − «Пахтакор» 2:2
Голлар: Ҳайбари 33, Ҳазозий 83 - Сергеев 60, Махарадзе 70 пенальти
«Ал Шабоб»: Абдуллоҳ, Ал Аста, Муҳаммад, Рафиня, Аҳмад Атиф, Абдулмалик Ал Ҳайбари, Фаллатаҳ, Абду Атеф, Авал, .Абдулраҳмон Ал Ҳайбари, Антви.
«Пахтакор»: Лобанов, Кримец, Ораховац, Исматуллаев, Махарадзе, Искандеров, Сергеев, Мерзляков, Ҳошимов, Андреев, Козак.
Изоҳ (0)