“Paxtakor” klubi Osiyo Chempionlar ligasi guruh bosqichi doirasida safarda “Al Shabob”ga qarshi uchrashuvda maydonga tushdi va durang o‘ynadi, deb xabar bermoqda “Uff.uz”.
Avvaliga birinchi bo‘limda “sherlar”ning ishi u qadar yurishmadi. Boz ustiga gol ham o‘tkazib yuborildi. Himoyaning xatosi evaziga “Al Shabob” hisobni ochishga muvaffaq bo‘ldi.
Ushbu goldan so‘ng ham Samvel Babayan shogirdlarining o‘ziga kelishi qiyin bo‘ldi. Tanaffusga qadar o‘yinning borishida o‘zgarish bo‘lmadi. Faqat ikkinchi bo‘limda “Paxtakor” futbolchilari tashabbusni o‘z tomoniga og‘dira oldilar.
Samvel Babayan ikkinchi bo‘lim boshidayoq maydon markazida o‘zgarish qilishga qaror qildi. Asosiy e’tiborni himoyaga qaratgan Akbar Ismatullayev o‘rniga hujumkor yarim himoyachi Jaloliddin Masharipov maydonga tushirildi. Aynan mana shu zaxira almashtirishi o‘yinning borishini o‘zgartirib yubordi. 71-daqiqada Jaloliddin Masharipov to‘pni jarima maydonchasi tomon oshirib berdi. Igor Sergeyevning birinchi zarbasi qovushmagan edi, ammo darvoza to‘siniga tegib qaytgan to‘pga uning o‘zi birinchi bo‘lib yetib keldi va hujumchi ikkinchi imkoniyatda adashmadi.
Oradan hech qancha vaqt o‘tmay “Paxtakor” ikkinchi golini kiritdi. Bu golda ham asosiy ishni Igor Sergeyev bajardi, deyish mumkin. Sergeyev raqib jarima maydonchasi ichida to‘pni o‘ziga o‘nglab olayotganda raqib himoyachilari unga nisbatan qo‘pollik qildilar. Hakam ikkilanmay penalti belgiladi. O‘n bir metrlik belgidan zarba berishda Kaxi Maxaradze adashmadi va “Paxtakor” hisobda oldinga chiqib oldi.
Biroq bu gol “Paxtakor”ga g‘alaba keltirish uchun kamlik qildi. O‘yin yakunlanishiga bir necha daqiqa qolganida himoya xatoga yo‘l qo‘yildi va “Al Shabob” hisobni tenglashtirdi.
OChL-2015, “B” guruhi, 2-tur.
“Al Shabob” − “Paxtakor” 2:2
Gollar: Haybari 33, Hazoziy 83 - Sergeyev 60, Maxaradze 70 penalti
“Al Shabob”: Abdulloh, Al Asta, Muhammad, Rafinya, Ahmad Atif, Abdulmalik Al Haybari, Fallatah, Abdu Atef, Aval, .Abdulrahmon Al Haybari, Antvi.
“Paxtakor”: Lobanov, Krimets, Oraxovats, Ismatullayev, Maxaradze, Iskanderov, Sergeyev, Merzlyakov, Hoshimov, Andreyev, Kozak.
Izoh (0)