«Жисмоний ва юридик шахсларнинг мурожаатлари тўғрисида»ги Ўзбекистон Республикаси Қонунининг ижросини таъминлаш доирасида ишлаб чиқилган Ўзбекистон автомобиль ва дарё транспорти агентлиги бошлиғининг ҳудудий бўлимларда жисмоний шахсларни ва юридик шахсларнинг вакилларини қабул қилиш жадвалига асосан 2015 йилнинг 19 февраль куни Қорақалпоғистон Республикаси ҳудудий бўлимида агентлик раҳбари V. Исмоиловнинг сайёр қабули ўтказилди. Бу ҳақда агентликнинг ахборот хизмати хабар беради.
Учрашув кўринишида ташкил этилган ушбу тадбирда Қорақалпоғистон Республикаси ҳудудий бўлими бошлиғи ва мутахассислари ҳамда автомобиль транспортида юк ва йўловчи ташиш фаолияти билан шуғулланувчи корхоналарнинг вакиллари иштирок этди.
Агентлик бошлиғи V. Исмоилов, аввало, 2014 йил 3 декабрда қабул қилинган «Жисмоний ва юридик шахсларнинг мурожаатлари тўғрисида»ги қонуннинг мазмун-моҳияти тўғрисида маълумот берди, жумладан, мурожаатларнинг шакллари, турлари, уларга қўйиладиган талаблар, жисмоний шахсларни ва юридик шахсларнинг вакилларини қабул қилиш, мурожаатларни бериш ва уларни кўриб чиқиш тартиби, муддатлари, мурожаатларни кўрмай қолдириш асослари, уларни кўриб чиқишда жисмоний ва юридик шахсларнинг ҳуқуқлари ҳамда давлат органларининг мажбуриятлари, моддий зарарнинг ўрнини қоплаш ва маънавий зиённи компенсация қилиш, мурожаатлар тўғрисидаги қонун ҳужжатларини бузганлик учун жавобгарликка оид қоидалар ҳақида маъруза қилди.
Шундан сўнг автокорхоналарнинг вакиллари ўз фаолиятларида дуч келаётган муаммолар юзасидан шикоят ва таклифлар билан мурожаат қилди. Агентлик бошлиғи барча саволларга батафсил жавоб берди.
Хусусан, «Қалъалик автотранс» МЧЖ вакили тегишли лицензия ҳужжатларисиз автотранспорт хизмати кўрсатаётган ташувчилардан шикоят қилиб, «киракаш»лар фаолиятини тугатиш бўйича ўз фикр-мулоҳазалари ва таклифлари билан ўртоқлашди.
Шунингдек, V. Исмоилов тадбиркорларга қулайлик яратиш мақсадида шаҳарлараро ва халқаро ташувларга лицензия олиш учун Тошкентга бормасдан, ҳужжатларни Интернет орқали юбориш ва тайёр лицензияларни ҳудудий бўлимнинг ўзида қабул қилиб олишга имкон берувчи тизим ишлаб чиқилаётгани ва у 2015 йилнинг учинчи чорагида тўлиқ жорий этилишини таъкидлаб ўтди.
Қабул якунида тадбиркорларга муаммоли масалалар, таклифлар ва шикоятлар билан Агентлик бошлиғига электрон почта орқали бевосита мурожаат қилиш мумкинлиги эслатилди.
Изоҳ (0)