2014 йилда Ўзбекистон Республикаси божхоначилари томонидан ҳуқуқни муҳофаза қилувчи бошқа идоралар вакиллари билан ҳамкорликда 287 та божхона қоидабузларлиги фош қилиниб, қиймати 13 миллиард сўмдан ортиқ бўлган 118 килограмм оғирликдаги тилла ва заргарлик буюмларининг ноқонуний олиб ўтилишига чек қўйилди. Бу ҳақда Ўзбекистон Республикаси Давлат божхона қомитасининг расмий сайтида хабар берилди.
Жумладан, Тошкент вилояти «Навоий» чегара божхона пости ходимлари томонидан қўшни давлатдан кириб келаётган пойтахтлик аёл холислар иштирокида шахсий кўрикдан ўтказилганда, кийимлари орасидан оёғига полиэтелин ўрамларни боғлаб олганлиги, уларга йўловчи божхона декларациясида қайд қилинмаган 25 дона турли тилла тақинчоқлар ва 16 дона тилла қуймалари яширилгани аниқланди. Жами оғирлиги 70 граммдан ортиқ мазкур тилла бойликларининг умумий қиймати дастлабки маълумотларга кўра, салкам 8,5 миллион сўмни ташкил қилади.
«Келес» темир йўл чегара божхона пости ходимлари томонидан Москва — Тошкент йўналиши бўйича кириб келган поезд йўловчиси бўлган наманганлик аёлнинг қиймати 11,7 миллион сўмдан ортиқ бўлган 78,31 грамм оғирликдаги заргарлик буюмларини божхона назоратидан беркитишга уринган фош этилди.
Истанбулдан учиб келган бухоролик аёлнинг «Тошкент-Аэро» ихтисослаштирилган божхона комлпекси ходимларининг кўзини шамғалат қилишга бўлган уриниши наф бермади. Холислар иштирокидаги шахсий кўрик давомида бу аёл яширинча олиб киришга мўлжалланган қиймати 3 миллион сўмдан ортиқ бўлган 50 грамм оғирликдаги тилла тақинчоқларни курткасининг чўнтагидан чиқаришга мажбур бўлди.
Айни шу рейс билан учиб келган яна бир бухоролик аёлнинг ҳам Туркия саёҳати ўзи учун ёқимсиз якун топди. Йўловчи божхона декларациясида ҳамда божхона ходимининг оғзаки сўрови пайтида маълум қилмасдан туриб бу аёл 86 грамм оғирликдаги тилла буюмларни олиб киришга урингани боис пойтахт халқаро аэропортини тарк этиши бироз чўзилди.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Изоҳ (0)