2014-yilda O‘zbekiston Respublikasi bojxonachilari tomonidan huquqni muhofaza qiluvchi boshqa idoralar vakillari bilan hamkorlikda 287 ta bojxona qoidabuzlarligi fosh qilinib, qiymati 13 milliard so‘mdan ortiq bo‘lgan 118 kilogramm og‘irlikdagi tilla va zargarlik buyumlarining noqonuniy olib o‘tilishiga chek qo‘yildi. Bu haqda O‘zbekiston Respublikasi Davlat bojxona qomitasining rasmiy saytida xabar berildi.
Jumladan, Toshkent viloyati “Navoiy” chegara bojxona posti xodimlari tomonidan qo‘shni davlatdan kirib kelayotgan poytaxtlik ayol xolislar ishtirokida shaxsiy ko‘rikdan o‘tkazilganda, kiyimlari orasidan oyog‘iga polietelin o‘ramlarni bog‘lab olganligi, ularga yo‘lovchi bojxona deklaratsiyasida qayd qilinmagan 25 dona turli tilla taqinchoqlar va 16 dona tilla quymalari yashirilgani aniqlandi. Jami og‘irligi 70 grammdan ortiq mazkur tilla boyliklarining umumiy qiymati dastlabki ma’lumotlarga ko‘ra, salkam 8,5 million so‘mni tashkil qiladi.
“Keles” temir yo‘l chegara bojxona posti xodimlari tomonidan Moskva — Toshkent yo‘nalishi bo‘yicha kirib kelgan poyezd yo‘lovchisi bo‘lgan namanganlik ayolning qiymati 11,7 million so‘mdan ortiq bo‘lgan 78,31 gramm og‘irlikdagi zargarlik buyumlarini bojxona nazoratidan berkitishga uringan fosh etildi.
Istanbuldan uchib kelgan buxorolik ayolning “Toshkent-Aero” ixtisoslashtirilgan bojxona komlpeksi xodimlarining ko‘zini shamg‘alat qilishga bo‘lgan urinishi naf bermadi. Xolislar ishtirokidagi shaxsiy ko‘rik davomida bu ayol yashirincha olib kirishga mo‘ljallangan qiymati 3 million so‘mdan ortiq bo‘lgan 50 gramm og‘irlikdagi tilla taqinchoqlarni kurtkasining cho‘ntagidan chiqarishga majbur bo‘ldi.
Ayni shu reys bilan uchib kelgan yana bir buxorolik ayolning ham Turkiya sayohati o‘zi uchun yoqimsiz yakun topdi. Yo‘lovchi bojxona deklaratsiyasida hamda bojxona xodimining og‘zaki so‘rovi paytida ma’lum qilmasdan turib bu ayol 86 gramm og‘irlikdagi tilla buyumlarni olib kirishga uringani bois poytaxt xalqaro aeroportini tark etishi biroz cho‘zildi.
Hozirda mazkur holatlar yuzasidan bojxona tekshiruvlari va surishtiruv harakatlari davom ettirilmoqda.
Izoh (0)