Япониянинг Mitsubishi Hitachi Power Systems компанияси ва «Ўзбекэнерго» давлат акциядорлик компанияси Ўзбекистондаги иссиқлик электр станцияларидан фойдаланиш ва техник хизмат кўрсатиш бўйича ҳамкорлик қилади, деб хабар бермоқда «Gazeta.uz».
Ўтган ҳафтада томонлар ҳамкорлик тўғрисида меморандум имзолаган. У Ўзбекистондаги электр станциялари учун тайёрланган ва етказиб бериладиган турбиналар сотилгач, монтаж, ишга тушириш-созлаш, консультация, таъмирлаш хизматларини кўрсатишни назарда тутади.
Mitsubishi Навоий ва Талимаржон ИЭСларни модернизация қилиш доирасида буғ-газ ускуналарини етказиб берувчи ҳисобланади. 2012 йилда Туркиянинг Calik Enerji Sanayi ve Ticaret AS ва Испаниянинг Initec компаниялари билан консорциум таркибида Навоий ИЭС модернизациясида қатнашган.
2013 йилда Жанубий Кореянинг Daewoo ва Hyundai компаниялари консорциуми билан 2017 йилгача Талимаржон ИЭСни модернизация қилиш бўйича тузилган 861 миллионлик шартномада ҳам Mitsubishi ускуналарни етказиб беришга номзод сифатида қаралмоқда. Hitachi эса 2013 йилда Тошкент иссиқлик электр маркази учун газ-турбина ускунасини қурган.
Mitsubishi Hitachi Power Systems компанияси Mitsubishi Heavy Industries ва Hitachi томонидан ташкил этилган бўлиб, ўз фаолиятини 2014 йил 1 февралдан бошлаган.
Изоҳ (0)