Тошкентда Microsoft Lumia 535 смартфони 530 минг сўмдан сотувга чиқди

Ўзбекистонда Microsoft бренди остидаги биринчи мобил қурилма — Microsoft Lumia 535 смартфони сотила бошлади, дея хабар бермоқда «Mobinfo.uz». Бонус сифатида ўзбекистонлик харидорларга Хитойда ишлаб чиқарилган селфи учун штатив (селфи стик) ва 4 Гб ҳажмга эга microSD карточкаси таклиф этилади.

Microsoft Lumia 535 смартфони 2014 йилнинг кузида тақдим этилган эди. Моделнинг олд ва орқа панелларидаги Nokia логотипини энди Microsoft номи эгаллади.

Смартфонда 5 дюйм 540×960 пикселли дисплей, 1,2 ГГц частотага эга тўрт ядроли процессор, 1 Гб тезкор хотира, ҳар бири 5 мегапикселли олд ва орқа камера ўрнатилган.

Смартфон қуйи хусусиятларга эга ҳисобланса-да, унинг олд камераси бу турдаги смартфонлар орасида жуда яхши — унда рангларни автоматик равишда тиниқлаштирувчи функция ҳамда кенгроқ тасвир олиш имконияти яратилган.

Пойтахтдаги «Флешка» савдо мажмуасида қурилмани 532 минг сўмга харид қилиш мумкин.