Тошкент шаҳридаги Ўзбек либослари галереясида Hand made in Uzbekistan деб номланган миллий санъат фестивали бўлиб ўтди. Art Life Media масъулияти чекланган жамияти ташаббуси билан ўтказилган мазкур фестивалда 150 дан ортиқ ҳунарманд иштирок этди, деб хабар бермоқда Ўзбекистон Миллий ахборот агентлиги.
Мазкур санъат фестивалини ўтказишдан асосий мақсад миллий ҳунармандлик анъаналарини асраб-авайлаш, уларни давом эттириш, келажак авлодларга етказиш, ҳунармандларни қўллаб-қувватлаш, фаолиятини ривожлантириш, қадриятлар бардавомлигини таъминлашдан иборатдир.
Фестивалда наққошлик, кулолчилик, заргарлик, зардўзлик, ёғоч ўймакорлиги ва металл буюмлар, миллий матолар, кашта, попоп каби ҳунармандлик маҳсулотлари намойиши юртдошларимиз ва хорижлик меҳмонларда катта қизиқиш уйғотди.
«Ўзбекистонда биринчи бор бўлишим, — деди жанубий кореялик Чой Мин Ҳее. — Қадимий шаҳарлар, ўзига хос меъморлик анъаналари, ранглар уйғунлиги ва услубига эга тарихий обидалар мени ўзига ром этди. Бугун эса халқ амалий санъати намуналари, ҳунармандлик буюмларини кўриб ҳайратланмоқдаман. Халқингизнинг бой тарихи, юксак маданияти акс этган ноёб қадриятлари билан танишганимдан мамнунман».
Икки кун давом этган фестивалда миллий халқ ўйинлари, фолклор жамоаларининг чиқишлари, қўғирчоқсоз усталарнинг ижодий намойишлари ҳамда ҳунармандлик маҳсулотларининг кўргазма-савдоси ҳам ташкил этилди.
Изоҳ (0)