Холокост (Германиядаги яҳудийларнинг оммавий қириб ташланиши) қурбонларини хотирлаш халқаро кунига бағишлаб, Исроил ва Германиянинг Ўзбекистондаги элчихоналари пианиночи Ярон Колберг (Исроил) ва виолончелчи Николас Альтштедт (Германия) концертларини уюштиради.
Концертлар 27 январь куни 18:00 да Тошкентдаги «Туркистон» саройида ҳамда 28 январь куни 17:00 да Бухоро вилоят мусиқали драма театрида бўлиб ўтади.
Концерт дастурига Бах, Шуман, Дебюсси, Шостакович ва бошқаларнинг асарлари киритилган.
Ярон Колберг бир қанча нуфузли халқаро танловларнинг ғолиби ҳисобланади. У Карнеги-ҳолл, Катта Кремль саройи, Вашингтондаги Кеннеди маркази, Женевадаги Миллатлар саройи ва Бетховен-ҳолл каби дунёнинг энг машҳур майдонларида катта муваффақиятлар билан концертлар берган.
Таниқли мусиқачи Борис Пергаменшиковнинг охирги шогирдларидан бири саналадиган германиялик Николас Альтштедт ёш авлод вакиллари орасида дунёнинг энг яхши виолончелчиларидан бири ҳисобланади. Бир қанча халқаро танловлардаги ғалабалардан ва Густаво Дудамель раҳбарлигидаги Вена филармоник оркестри билан биргаликда Люцерндаги фестиваль иштирокидан кейин Николас 2010 йили Швейцариянинг Credit Suisse Young Artist Award мукофоти билан тақдирланган.
«Туркистон» саройидаги концертга бепул чипталарни сарой кассаларидан 20, 21 ва 22 январь кунлари олиш мумкин. Бухородаги концерт учун бепул чипталар эса 28 январь куни театрга кириш вақтида тарқатилади.
Изоҳ (0)