«Тошшаҳартрансхизмат» АК икки йил ичида Тошкент жамоатчилик транспортида смарт-карта орқали контактсиз тўлов тизимини йўлга қўйишни режалаштирмоқда, деб ёзади Uzbekistan Today.
Янги тизим бўйича босиб ўтилган масофага қараб пул тўланади ва йўлкира тўлови таҳлилидан келиб чиқиб, йўналиш тармоғи янада оптималлаштирилади.
Компания тизимни жорий этиш бўйича саккизта, жумладан иккита маҳаллий компаниядан келиб тушган таклифларни кўриб чиқмоқда. Айни пайтда халқаро тажриба ҳам ўрганилмоқда.
«Биз молиялаштириш масалаларини ҳам ҳал этишимиз зарур, бу мақсадларга кредит маблағлари жалб этилиши ҳам мумкин. Якуний экспертизадан сўнг лойиҳа кўриб чиқиш учун ҳукуматга йўналтирилади», — деди «Тошшаҳартрансхизмат» АК бошқарув раиси Отабек Содиқов.
Унинг таъкидлашича, автобуслар сонидан келиб чиқиб, тизимни жорий этиш учун 3—4 ой талаб этилади.
Изоҳ (0)