«Тошшаҳартрансхизмат» автобуслар ёниши сабабларини маълум қилди

«Тошшаҳартрансхизмат» акциядорлик компанияси сўнгги йилларда кузатилаётган Mercedes-Benz русумидаги автобусларнинг ёниб кетиши сабабларини маълум қилди, деб хабар бермоқда «Газета.uz.

Маълум қилинишича, Mercedes-Benz автобуслари ёнишининг асосий сабаби электр ускуналари тизими электр симларидаги қисқа туташувлардир.

«Ўзбекистон автобуслардан фойдаланиш шароитлари оғир бўлган минтақага киради. Бу Тошкентда фойдаланилаётган автобусларнинг ишлаб чиқарувчиси – Германиянинг Evo Bus GmbH компанияси томонидан ҳам тан олинган. Ҳавонинг кучли даражада ифлослангани, ёз ва қиш мавсумларида атроф-муҳитдаги ҳаво ҳарорати кескин ўзгариб туриши автобусларнинг тегишли узел ва агрегатларига салбий таъсир кўрсатади ва уларнинг ишончлилигини камайтиради», – дейилади «Тошшаҳартрансхизмат» жавобида.

«Бундай шароитларда Mercedes-Benz Conecto O345 автобусларининг 10 йилдан ортиқ ишлаши электр симларининг пластик изоляциясининг бутунлиги ишдан чиқишига сабаб бўлди. Автобусларнинг ҳаракат даври ошиб бориши билан уларда носозликлар келиб чиқади, меҳнат сарфи ошади, фойдаланиш ишончлилиги пасаяди. Шундан келиб чиқиб, ҳозирги вақтда Mercedes-Benz Conecto O345 автобуслари босқичма-босқич фойдаланишдан чиқарилмоқда ва 2015 йил охирига бориб ушбу автобуслардан фойдаланиш тўлиқ тўхтатилади», – деди компания вакиллари.

Замонавийроқ ҳисобланган паст полли Mercedes-Benz Conecto Low Floor автобусларидаги ёнғинлар ҳам фойдаланишнинг иқлимий хусусиятлари ва автобус конструкциясидаги камчиликлар билан боғлиқлиги қайд этилди.

«Тошшаҳартрансхизмат» комиссияси томонидан автобусларнинг ёниши билан боғлиқ ҳар бир ҳолат юзасидан ёнғин сабабларини аниқлаш бўйича хизмат текширувлари ўтказилмоқда. Текширувлар якунлари бўйича компаниянинг айбдор мансабдор шахсларни зарарланган автобусни ўз ҳисобидан қоплаб бериш мажбурияти билан жазолаш ҳақида буйруғи чиқарилмоқда.

Mercedes-Benz автобусларининг ёниши билан боғлиқ ҳар бир ҳолат юзасидан Evo Bus GmbH’га хатлар йўлланган, улар асосида компания экспертлари мустақил текширувлар ўтказган. Конструкциядаги носозликлар Mercedes-Benz Conecto Low Floor автобусларининг 2012 йил (100та) ва 2013 йилдаги(100та) сўнгги икки партиясини етказиб беришда инобатга олинган.