Фарғонадаги мактабда сохта диплом билан жисмоний тарбиядан дарс берган фуқаро қўлга олинди
Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш (СВОЖЖДЛҚК) департаменти ходимлари томонидан ўтказилган текшириш ва тадбирларда ўқитувчи касбини эгаллаш мақсадида қалбаки ҳужжат тайёрлаган шахс қўлга олинди. Бу ҳақда «Ҳуқуқ» газетаси хабар берди.
Маълум бўлишича, Фарғона вилоятининг Сўх туманида яшовчи фуқаро Олимжон Турдиев (исм-фамилияси ўзгартирилган)нинг 2012 йилда Фарғона шаҳрида дастлабки тергов ва суд жараёнида шахсини аниқлашнинг имкони бўлмаган Эркин исмли шахс билан танишади ва унинг қўлидан Қўқон Давлат педагогика институтининг дипломини тайёрлаб бериш келишини эшитиб, шу масалада илтимос қила бошлайди.
Эркин бу илтимосни рад эта олмайди ва кўп ўтмай яхшигина хизмат ҳақи эвазига О.Турдиев ушбу институтнинг «Жисмоний тарбия ва жисмоний маданият факультети»ни тамомлаганлиги ҳақидаги қалбаки диплом ҳамда иловасини унга тутқазади. О.Турдиев эса диплом қалбаки эканлигини билса-да, бемалол Сўх туманидаги мактабларнинг бирига тақдим этади ва ушбу даргоҳда жисмоний тарбия фани ўқитувчиси вазифасида иш бошлайди.
Судга оид хатшунослик экспертизасининг хулосасига кўра, ушбу диплом ва унинг иловаси рангли принтер ёрдамида қалбакилаштирилганлиги ҳамда Қўқон Давлат педагогика институтининг маълумотномасидан О.Турдиев ушбу даргоҳни тамомламаганлиги маълум бўлди.
