Facebook’нинг ўзбекистонлик фойдаланувчилари Тошкентда Coca-Cola’нинг Янги йил юк машиналари пайдо бўлгани, улар шаҳарнинг турли нуқталарида тўхтаб, ўткинчиларга бепул совғалар улаша бошлаганини маълум қилди.
Potrebitel.uz гуруҳи фойдаланувчиси бундай юк машинасига Алишер Навоий номидаги истироҳат боғи яқинида дуч келганини ва ўйинчоқ айиқчага эга бўлганини ёзган ҳамда далил сифатида фотосуратларни илова қилган.
Муаллифнинг аниқлик киритишича, совғани олиш учун юк машинасига яқинлашиб, ундаги тугмачани босиш керак, шунда дарча очилиб, Coca-Cola логотипи туширилган шарф, футболка, айиқча, кола ичимлиги ёки бошқа совғалар чиқариб берилади.
Хабарга ёзилган изоҳларда кўпчилик ушбу акцияни қўллаб-қувватлаган ва Coca-Cola юк машиналари йўналиши билан қизиққан. Фойдаланувчилар уларни шаҳарнинг турли нуқталарида кўрганини қайд этган.
Coca-Cola Bottlers Uzbekistan Ltd’нинг Facebook’даги саҳифасида Янги йил юк машиналари йўналиши ҳақида қолдирилган саволларга мужмал жавоб берилиб, уларнинг шаҳар маркази бўйлаб юриши айтилган.
Изоҳ (0)