Facebook’даги гуруҳлардан бирида Тошкентнинг Қушбеги кўчаси қоқ ўртасида қолдириб кетилган Lacetti расми пайдо бўлди. Унда O909HA давлат рақамига эга қора Lacetti пиёдалар ўтиш йўлакчаси устида тўхтаб турганини, ичида ҳайдовчиси йўқлигини кўриш мумкин.
Хабар муаллифи тахмин қилишича, ушбу автомобиль йўл ўртасига тўхтаган ягона машина бўлмаган. «Ҳайдовчи Lacetti’ни бу ерда қолдирганида, атрофида бошқа машиналар ҳам бўлган. Улар жўнаб кетгач, Lacetti йўл ўртасида ёлғиз бўлиб қолган, шекилли», — деб ёзади фойдаланувчи.
Муаллифнинг аниқлик киритишича, шу йўл ёқасида тамаддихона бўлиб, бу ерда машиналарнинг деярли йўл ўртасида қолдириб кетилиши одатий ҳолдир. У ҳайдовчиларни ўз уловларини тамаддихонадан узоқ бўлса ҳам, тўхташ мумкин бўлган жойда қолдиришга чақирди.
«Овқатлангандан кейин машинагача пиёда юриб бориш соғлиқ учун ҳам фойдали бўлади», — дея қўшимча қилди фойдаланувчи.
Постга фикр билдирганлар кўпчилик узоқ пиёда юришга эриниши туфайли мана шундай қоидабузарликлар келиб чиқишини қоралади.
Изоҳ (0)