БМТ Бош котиби Пан Ги Мун жангариларнинг Чеченистон пойтахти Грознийга ҳужумини қоралади ва террорчилик ҳаракатларини оқлаб бўлмаслигини таъкидлади. Бу ҳақда 4 декабрь, пайшанба куни бош котибнинг расмий вакили Стефан Дюжаррик баёнот берди, деб ёзади ТАСС.
Дюжаррикнинг айтишича, Пан Ги Мун «мудҳиш жиноятлар» қурбонлари оилаларига, шунингдек Россия Федерацияси ҳукумати ва халқига ҳамдардлик билдирди.
Эслатиб ўтамиз, 4 декабрга ўтар кечаси Грознийда жангарилар йўл-патрул хизмати постига ҳужум қилиб, уч полициячини ўлдирди. Шундан сўнг бандитлар Матбуот уйига яшириниб олди. Ҳукумат аксилтеррорчилик операцияси режимини жорий қилди. Матбуот уйи вайрон қилинди, жангариларнинг қолгани унинг яқинидаги мактаб биносида йўқ қилинди. Россия Миллий аксилтеррорчилик қўмитаси маълумотларига кўра, жами 10 нафар жангари йўқ қилинган. Шунингдек, ҳуқуқни ҳимоя қилиш органларининг 10 нафар ходими ҳалок бўлган, 28 нафари яраланган.
Изоҳ (0)