Япониялик рассом Юсуши Такахаши севган қизига атаб бутун Япония ҳудуди ҳажмида «Менга турмушга чиқ» («Marry me») ёзувини ёзиш учун олти ой давомида жаҳонгашталик қилди. Бу ҳақда «Российская газета» хабар бермоқда.
Юсуши ўзи севган қизга турмуш қуриш таклифини билдириш учун ижодкор киши сифатида ноодатий йўлни танлади ва ишини ташлаб Япония бўйлаб саёҳатга отланди. Унинг мақсади ўз мамлакати харитасида GPS ёрдамида «Менга турмушга чиқ» ёзувини ёзиб чиқишдан иборат бўлди. Шу ниятда Такахаши 7163 километр йўлни асосан пиёда босиб ўтди.
Аввалдан режалаштирилган йўналиш бўйича юриб, «ёзув»ни битиргач, рассом Хоккайдо оролига ўтди ва у ерда ўқ қадалган юрак тасвирини чизди. Уйга қайтганида эса қиз уни «Ҳа…» жавоби билан кутиб олди.
Такахаши харитага муҳрлаган ёзув ва расм дунёдаги энг катта GPS-расм деб эътироф этилди, рассомнинг ўзи эса Гиннеснинг Рекордлар китобига кирди.
Изоҳ (0)