2025 йилнинг биринчи ярмида электромобиллар савдоси 28 фоизга ошиб, 9,1 миллион донага етди. Бу ҳақда Британиянинг Rho Motion тадқиқот компаниясига таяниб, Anadolu агентлиги маълум қилди.
Мазкур йўналишда Хитой ўз етакчилигини қўлдан бой бермаяпти. Жорий йилнинг биринчи олти ойлигида дунё бўйлаб сотилган барча электромобилларнинг асосий қисми, аниқроқ айтганда, 5,5 миллион машина айнан ушбу мамлакат ҳиссасига тўғри келган.
Хитойда электромобиллар савдоси ўтган йилга нисбатан 32 фоизга ошган. Экспертлар бу кўрсаткич йилнинг иккинчи ярмида ҳам юқорилигича қолишини прогноз қилмоқда. Европада ҳам 26 фоиз ўсиш кузатилиб, 2 миллион донага яқин машина сотилган. Бироқ Шимолий Америкада бозор 3 фоизга пастлаб, 900 минг электромобиль янги эгаларига етказилган.
Қолган минтақаларда ҳам электромобиль савдоси 40 фоизга ошиб, 700 минг донага етди. Умуман олганда, мазкур бозор глобал миқёсда барқарор ўсишда давом этяпти.
Изоҳ (0)