Россиянинг «Моя планета» телеканали расмий статистика ва рейтингларга асосланган ҳолда Ер юзидаги энг ёмон шаҳарлар рўйхатини тузиб чиқди.
Сюдад-Хуарес − жиноятчилик бўйича етакчи
Мексиканинг АҚШ билан чегараси яқинида жойлашган ушбу шаҳарда қотиллик миқдори бўйича дунёдаги энг юқори кўрсаткич қайд этилган: йилига ҳар 100 минг аҳолидан 120−170 кишиси жиноятчилар қўлида ҳалок бўлади.
Сингапур − энг қиммат шаҳар
The Economist журналига қарашли Economist Intelligence Unit томонидан тузилган энг қиммат шаҳарлар рейтингида Сингапур бу йил анъанавий қиммат шаҳарлар − Париж ва Лондонни ортда қолдирди. Кичик ҳудудда кўп иншоотлар ва инфратузилмани жойлаштириш зарурати борлиги сабабли сингапурликлар деярли ҳамма нарса учун уч баравар қиммат тўлашларига тўғри келади.
Агбогблоши − энг ифлослантирилган шаҳар
Ганадаги ушбу шаҳар АҚШ, Япония ва Европадан келтириладиган маиший электротехниканинг энг катта ахлатхонаси билан танилган. Турли зарарли моддалар миқдори бу шаҳарда меъёрдан 100 марта ортиқлиги аниқланган.
Боғдод − яшаш учун энг ёмон шаҳар
Mercur Human Resource компанияси томонидан турмуш даражаси бўйича тузилган рейтингда Ироқ пойтахти Боғдод шаҳри сўнгги − 223-поғонани эгаллаган.
Дакка − аҳоли зичлиги энг юқори шаҳар
Бангладеш пойтахти Дакка шаҳрининг аҳолиси 15 миллионга яқин бўлиб, ичидан Ганг ва Брахмапутра дарёлари ва бир нечта каналлар оқиб ўтади. Бир квадрат километрга 44 минг киши тўғри келадиган ушбу шаҳар аҳоли зичлиги бўйича дунёда биринчи ўринда туради. Саёҳатчилар Даккани ёмон ҳидлар тараладиган ва аҳоли кўпайишига бардош беролмаган шаҳар сифатида таърифлайди.
Лонгйир − энг совуқ шаҳар
Норвегиянинг 2050 киши яшайдиган Лонгйир шаҳри Ернинг энг шимолида жойлашган шаҳар ҳисобланади. Ғарбий Шписберган оролидаги ушбу шаҳардан Шимолий Қутбгача бўлган масофа 1305 километрни ташкил этади. Бу ерда ўртача йиллик ҳарорат -6 даражага тенг.
Гома − энг хавфли шаҳар
Конго Республикасидаги 377 минг аҳолига эга ушбу шаҳарни сейсмологлар иккинчи Помпей деб атайди. Унинг ёнгинасида жойлашган Африкадаги энг хавфли Нирагонго вулқони 1882 йилдан буён 30 мартадан кўпроқ отилган. Ҳар сафар вулқондан отилган лава диаметри 2 километр, чуқурлиги 250 метр бўлган кратерни тўлдиради ва исталган сонияда қирғоқдан ошиб чиқиши мумкин. Натижада ҳар сафар минглаб уйлар вайрон бўлади.
Москва − саёҳат учун энг ёмон шаҳар
Москва шаҳри TripAdvisor портали томонидан тузилган сайёҳлик йўналишлари рейтингида охирги ўринни эгаллаган. Россия пойтахти бирйўла беш йўналиш − «Хушмуомала ҳамшаҳарлар», «Дўстона таксичилар», «Энг яхши такси хизматлари», «Энг яхши сифат − нарх мутаносиблиги» ва «Энг яхши меҳмонхоналар» бўйича охирги бўлган. Шунингдек, Москва ҳайдовчиларга энг кўп муаммо туғдирувчи шаҳарлар рейтингида биринчи ўринда кўрсатилган.
Изоҳ (0)