Исроил президенти Реувен Ривлин мамлакат бош вазири Биньямин Нетаньяху томонидан илгари сурилаётган, Исроил мақомини яҳудий халқи миллий давлати деб белгиловчи қонун лойиҳасини кескин танқид қилиб гапирди. Бу ҳақда ТАСС хабар берди.
Таъкидлаш жоиз, Исроил ҳукумати 23 ноябрь, якшанба куни давлатнинг яҳудийча хусусияти ҳақида ҳукмрон коалицияни парчалаб ташлаш ва араб муҳитида тангликни кучайтиришга таҳдид қилувчи асосий қонун лойиҳасини тасдиқлаган эди.
Парламентга кўриб чиқиш учун тақдим этиладиган ҳужжат Исроилнинг яҳудий халқи давлати сифатидаги мақомини, яҳудийларни эса ушбу давлат ҳудудида ўз тақдирини ўзи белгилаш ҳуқуқига эга ягона халқ эканлигини тасдиқлайди.
Бундан ташқари, қонун лойиҳасининг версияларидан бирида араб тилини давлат тили мақомидан маҳрум этиш, яҳудий диний ҳуқуқ ва анъаналарни қонунчилик асослари сифатида белгилаб қўйиш таклиф этилган.
Ривлин айтишича, Мустақиллик ҳақидаги декларация низомига мувофиқ, Исроилдаги араб жамоатчилиги ва бошқа камчилик халқлар ўзларини сургунда яшаётгандек ҳис қилмаслиги керак.
Исроил Мустақиллик декларацияси ва Асосий қонунларида унинг мақоми «яҳудий ва демократик давлат» сифатида белгиланган. Унга мувофиқ, Исроил барча яҳудийларга муҳожирлик ҳуқуқини тақдим этиб, шу билан бирга, ирқи, дини, миллатидан қатъий назар ҳар бир кишининг ҳаёти ва қадр-қимматини ҳимоя қилади. Исроил президенти яҳудий ва демократик хусусиятларнинг ҳар иккаласи тенгма-тенг ва бирга бўлиши кераклигини, айнан шу Исроил давлати руҳини ташкил этишини таъкидлади.
Изоҳ (0)