Яқин кунларда мухлислар эътиборига «Катта ҳовли» деб номланган мусиқали комедия ҳавола этилади, деб хабар бермоқда Popcorn.uz.
Фильм премьераси олдидан «Ўзбегим таронаси» радиосида мазкур картинанинг бош продюсери, сценарий муаллифи ва постановкачи режиссёри Нилуфар Иброҳимхўжаева билан эксклюзив интервью уюштирилди.
Меҳмон билан радиобошловчи Жамшид Ҳожиниёзов қизғин ижодий суҳбат олиб бориб, фильмда суратга тушган актёрлардан тортиб тасвирга олиш жараёнидаги қийинчиликларгача сўради.
Нилуфар Иброҳимхўжаева бундан аввал катта телелойиҳа ва бир неча кинофильмлар сценарий муаллифи сифатида ишлагани, аммо катта фильмдаги илк режиссёрлик иши эканини айтиб ўтди.
«Катта ҳовли» мусиқали фильмида 90 га яқин персонажлар бўлиб, фильмда таниқли актёр ва хонандалардан тортиб эндигина суратга тушаётган янги чеҳраларни ҳам кўриш мумкин.
Асосан қишлоқ ҳаётини акс эттирган, ўзбек халқининг самимий ва беғубор қалби, соддадиллигини кўрсатувчи мазкур картина орқали Ўзбекистондаги ислоҳотлар ва бунёдкорлик ишлари ҳам ёритилади. Картина мусиқали комедия жанрида бўлиб, унда миллий қўшиқлар янгича талқинда янграйди.
«Бир кунда уч ёки тўртта эпизодларни суратга олган вақтларимиз бўлди. Эрта тонгда олинадиган эпизод Сўқоқда, тушдагиси Ғазалкентда, кечқурунгиси Паркентда ва эртаси саҳарда Ҳумсонда бўлишимиз керак эди. Ижодий гуруҳимиз 30 кишидан ортиқ, қолаверса, техника воситалари, реквезитлар ва либослар билан у ердан бу ерга кўчиб бориб, тасвирга олишнинг ўзига яраша машаққатлари бўлди.
Фильм яратилишининг энг асосий мақсади миллий қадриятларимиз ҳамда мумтоз мусиқамизни тарғиб этиш ва барча машҳур актёрлар қатори анчадан буён кўринмаётган актёрларни экранга қайтариш, қолаверса, юртимизнинг гўзал қишлоқлари-ю сўлим гўшаларига назар ташлашдан иборат эди. Буни қай даражада кўрсата олдик, фильм томошасидан сўнг маълум бўлади», — деди Нилуфар Иброҳимхўжаева.
«Катта ҳовли» мусиқали комедиясида актёр ва санъаткорлардан Озодбек Назарбеков, Гулсанам Мамазоитова, Машҳурбек Раимжонов, «Элдидо» гуруҳи, Фарҳод Абдуллаев, Толиб Ҳожиев, Эркин Комилов, Тўхтамурод Азизов, Ўткир Муҳаммаджонов, Абдураим Абдуваҳобов, Акбархўжа Расулов, Шуҳрат Нуралиев, Нозим Тўлахўжаев, Гулҳумор Абдуллаева, Муқаддас Саъдуллаева, Гулчеҳра Носирова каби машҳур актёрлар катта-кичик ролларни ижро этган.
«Катта ҳовли» мусиқали фильми премьераси 18 ноябрь куни бўлиб ўтади.
Изоҳ (0)