Тошкент ҳайвонот боғида сўнгги пайтларда жониворлар ўлими тез-тез кузатилаётгани муносабати билан муассаса раҳбарияти ташрифчиларга мурожаат қилди. Уни “Uz24” нашри ўз хабарида келтириб ўтди.
«Қафасларда сақланаётган ҳайвонлар кишиларда раҳм-шафқат уйғотади. Шу туфайли ташрифчилар уларга егулик беришга шошилади», — дейилади мурожаатда. Бироқ ҳайвонот боғида оч жониворларнинг ўзи йўқлиги, уларнинг барчаси муайян рацион бўйича озиқлантирилиши таъкидланади.
Шунингдек зоопарк меҳмонлари ҳайвонларга озиқ-овқат бериб, уларни бунга ўргатиб қўйиши қайд этилган. «Баъзилар турли кимёвий қўшимчаларга эга бўлган маҳсулотларни ўрамидан чиқармасдан туриб жониворларга беришади. Натижада ошқозон-ичак йўлига целлофан, фольга ёки бошқа буюмлар тиқилиб қолади», — дейилади баёнотда.
Унда айтилишича, ҳам ташрифчилар, ҳам ҳайвонлар хавфсизлигини таъминлаш мақсадида ҳайвонлар сақланадиган майдонларнинг барчаси панжаралар билан ўралган. Шунингдек боғнинг бутун ҳудуди бўйлаб кузатув камералари ўрнатилган.
Эслатиб ўтамиз, аввалроқ Тошкент ҳайвонот боғида эркак қўтос ошқозонига бегона жисм тушиши сабабли юзага келган ошқозон бузилиши натижасида юз берган асфиксия ва миокард инфартидан нобуд бўлган эди. Яқинда эса шунга ўхшаш сабаб билан фил ҳам вафот этди. Бундан ташқари, зоопаркдаги туяқуш ташрифчилар ташлаган пластик стаканни ютиб юбориб, аҳволи оғирлашган, бироқ ветеринарлар унинг ҳаётини сақлаб қолишга муваффақ бўлган эди.
Изоҳ (0)